ဘုရင်ဖြစ်လာတဲ့Facebook

ဆောင်းပါးရှင် - ကိုညီညီ ( တောင်ကြီး )

.

Facebook ဟာ နည်းပညာလောကရဲ့ထိပ်ပိုင်းမှာ ရပ်တည်နေပါတယ်။ တစ်ခြားဘယ်နည်းပညာကုမ္ပဏီမှ စီးပွားရေးလမ်းကြောင်းကနေ လူမှုဆက်ဆံရေးဖက်ကို သူ့လောက်လွယ်လွယ်လေး မပြောင်းနိုင်ခဲ့ပါဘူး။ ဒီလိုဖြစ်ရတဲ့အကြောင်းတွေကိုကြည့်လိုက်တဲ့အခါ ..

.

.

သုံးစွဲသူတွေဟာ Facebook  ကို စွဲနေကြတယ်

.

နေ့စဉ် Facebook သုံးစွဲသူ ( ၉၆၈ ) သန်းကျော်ရှိပါတယ်။ မှတ်မိလွယ်အောင်ပြောရရင် လူဦးရေ ( ၁ ) ဘီလျံလောက်ဟာ နေ့တိုင်း Facebook ကို မသုံးရရင် မနေနိုင်အောင်ဖြစ်နေတာနဲ့ သဏ္ဍန်တူတယ်။ ဒါကိုကမ္ဘာ့လူဦးရေနဲ့ အချိုးချကြည့်ရင် လူ ( ၇ ) ယောက်မှာ ( ၁ ) ယောက်က Facebook ကို နေ့တိုင်းသုံးနေတဲ့သဘောပါ။ အဲဒီတစ်ဦးတစ်ယောက်ကလည်း Facebook မှာ  ဟိုဟာလေး၊ ဒီဟာလေးရှာချင်တာမျိုးမဟုတ်ပဲ ( ၁ ) ရက်လုံးအချိန်ရဲ့ ( ၄၆ ) မိနစ်ကြာအောင် စွဲစွဲလမ်းလမ်းသုံးနေတာ သိရပါတယ်။

.

.

သုံးစွဲသူနေ့စဉ်တိုးလာနေတယ်

.

ပြီးခဲ့တဲ့နှစ်အစီရင်ခံစာအရ Facebook သုံးစွဲသူတိုးတက်နှုန်း ( ၁၃% ) ရှိပါတယ်။ ကြည့်လိုက်ရင်တော့ ကိန်းဂဏန်းက သေးသေးလေးပေမယ့် လူ ( ၁၃၂ဝ ) သန်း ကနေ ( ၁၄၉ဝ ) သန်း အထိတက်သွားတယ်ဆိုရင်တော့ ဂဏန်းသင်္ချာအပေါ်မှာ မအံ့သြပါနဲ့။

.

နောက်ထပ်ထူးခြားစေတဲ့ကိန်းဂဏန်းကတော့ ပြီးခဲ့တဲ့နှစ်ကထက်စာရင် သုံးစွဲသူ ( ၁၇၃ ) သန်း ပိုလာတာပါပဲ။  ဒီလူအုပ်ကြီးကိုမြင်သာအောင်ပြောပြရရင် ဂျာမဏီနိုင်ငံ နဲ့ ဗြိတိန်နိုင်ငံတို့ရဲ့လူဦးရေ ( ၂ ) အုပ်စုပေါင်းခြင်းနဲ့ ညီမျှပါတယ်။

.

.

လက်ရှိသုံးစွဲသူတွေ အလှမ်းကွာလာရင် နောက်တစ်ခုကိုကြိုစီစဉ်ထားတယ်

.

CEO မာ့ခ်ဇတ်ဂါဘတ်ဟာ Facebook ကျောထောက်နောက်ခံပြု Internet.org ကို အင်တာနက်မရသေးတဲ့ သန်းထောင်ချီတဲ့လူအုပ်ဆီကိုသွယ်တန်းပေးနေပါတယ်။ ဒါဟာ ပရဟိတအတွက်ချည်းသီးသန့်မဟုတ်ပါဘူး။ အွန်လိုင်းတက်သူများလာတာနဲ့အမျှ Facebook သုံးစွဲသူတိုးပွားရေးကို မျှော်မှန်းတာလည်း ပါပါတယ်။ ဒီကနေ လက်ရှိသုံးစွဲသူ လူဦးရေ သန်း ( ၁၅ဝဝ ) ကနေ ( ၃ဝဝဝ ) ၊ ( ၅ဝဝဝ ) မဖြစ်လာဘူးလို့ ဘယ်သူခန့်မှန်းနိုင်ပါသလဲ?

.

ဒါကြောင့်မို့ သူ့ထက်သူ Facebook ဟာ သူများမလုပ်သေးတဲ့ ခပ်မိုက်မိုက်နည်းပညာတွေသုံးပြီး လေယာဉ်ပျံနဲ့အင်တာနက်သုံးဖို့ Internet-Beaming Plane ဆိုတာလည်းတီထွင်နေရဲ့။ နောက်တစ်ခုက လေဆာရောင်ခြည်သုံးပြီး လူအချင်းချင်းဆက်သွယ်လို့ရအောင်လည်း ကြိုးစားနေလေရဲ့။

.

.

အများပိုင်ပြုလုပ်ပြီးနောက်မှာ Facebook ဟာ စီးပွားအရမ်းတက်လာတယ်

.

( ၂ဝ၁၂ ) ခုနှစ်ဦးပိုင်းမှာ အများပိုင်လုပ်ပြီးတဲ့ Facebook ဟာ စီးပွားရေးတစ်ဟုန်ထိုးတက်လာခဲ့တယ်။ အဲဒီအချိန်တုန်းက Facebook မှာ မိုဘိုင်းဖုန်းအားပြုတဲ့ကြော်ငြာမရှိသေးပါဘူး။ နောက်လပိုင်းလောက်ကျတော့ မိုဘိုင်းကြော်ငြာတွေစလက်ခံခဲ့တယ်။ အဲဒီနောက်မှာ သူ့ဝင်ငွေဟာ တန့်နေတာမျိုးမဟုတ်ပဲ တိုးသထက်တိုးလာခဲ့တယ်။ စီးပွားရေးစီမံခန့်ခွဲမှုဘက်ပြောရမယ်ဆိုရင် ..

.

.

Facebook မှာ တစ်ခြားနည်းလမ်းနဲ့ငွေရဖို့စောင့်နေတာတွေရှိတယ်

.

Facebook ဟာ Instagram ပေါ်မှာ Google လုပ်သလို မိမိကုန်ပစ္စည်းကိုကြော်ငြာတဲ့လုပ်ငန်းမျိုးကို စလုပ်နေပါပြီ။ စီးပွားရေးလေ့လာသုံးသပ်သူများက ဒီလုပ်ငန်းကနေ ဒေါ်လာဘီလျံချီပြီးဝင်မယ်လို့ ဟောကိန်းထုတ်နေကြတဲ့အချိန်လို့ဆိုရင်လည်း မမှားပါဘူး။

.

ဒါတောင် မက်ဆေ့ပို့တဲ့ App – Messaging ထုတ်ကုန်တွေကနေ ငွေမရှာရသေးပါဘူး။ သို့သော်လည်း မာ့ခ် ရဲ့ စကားထဲမှာ ဒီစာပို့ App ကနေ “ ငွေရပေါက်ကြီးမယ် ”  ဆိုတဲ့ပြောသံသဲ့သဲ့လေးတော့ ကြားနေရပါတယ်။ အခြေခံအားဖြင့်တော့ ပုံမှန် Facebook ရဲ့ News Feed မှာပေါ်လာသလို သုံးစွဲသူ နဲ့ ဈေးရောင်းတဲ့ကုမ္ပဏီတွေကို တိုက်ရိုက်မက်ဆေ့ပို့နိုင်အောင် ကြိတ်ကြံနေတယ်။

.

ကဲ .. ဒါအောင်ပြီဆိုရင်တော့ လာပါလေ့ ကုန်သည်တွေနားက နောက်ထပ်ဘီလျံချီဒေါ်လာတွေ..။ ဒီကနေ Facebook ရဲ့ Search ၊ Facebook for Work နဲ့ Oculus တို့ထဲက ဘယ်တစ်ခုက ထမပေါက်ဘူးလို့ အတပ်ပြောနိုင်ဦးမှာလဲ?

.

.

Facebook ရဲ့ သိမ်းပိုက်တဲ့ဗျူဟာက မိုက်တယ်

.

တစ်ကယ်လို့ ဆယ်ကျော်သက်လူငယ်ရှိတဲ့အိမ်မှာ ကလေးတွေက Facebook သုံးတာပျင်းလာတယ်ဆိုပါတော့ .. သူတို့လေးတွေ Instagram ပြောင်းသုံးကြမယ်။ သူကလည်း သုံးစွဲသူ သန်း ( ၃ဝဝ ) ရှိနေတာပဲ။ ဒါမှမဟုတ် သန်း ( ၈ဝဝ ) သုံးသမားရှိနေတဲ့ WhatsApp သုံးလည်းရသေးတာပဲ။ ခက်တာက အဲဒီ ( ၂ ) ခု စလုံး Facebook က ဝယ်ပြီးသားဗျ။

.

နောက်တစ်ခုက Facebook ပိုင် Messenger ကိုယ်တိုင် သုံးစွဲသူ သန်း ( ၇ဝဝ ) ရှိနေတယ်ဆိုတာ ထည့်တွက်ရဦးမယ်။

.

.

Facebook ဟာ ဒေါ်လာသန်း ( ၁၄ဝဝဝ ) ဈေးကွက်ရှိတဲ့ Hardware ဈေးကွက်ကိုလှမ်းနေတယ်

.

ဒေတာစင်တာတွေကို ရှေးကွန်ပျူတာဘိုးအေကြီး Cisco တို့လိုဒီဇိုင်းမျိုးယူပြီးတော့ လူတိုင်းဝင်ရေးနိုင်တဲ့ Open-Source License အနေအထားနဲ့ တည်ဆောက်နေပါတယ်။ သူ့ကိုမှီပြီးလုပ်စားကြမယ့် တက်သစ်စကုမ္ပဏီလေးတွေတောင် အနီးအနားမှာ လိုက်တည်လာတာကိုပါတွေ့နေရတယ်။

.

.

.

ဒါဆိုရင် သူ့ပြိုင်ဖက်တွေကရော ဘယ်သူတွေရှိနေသေးလဲ?

.

.

Apple လား?

.

လက်ပွတ်ဖုန်းတစ်လုံးထွင်ပြီး အညိမ့်သားစားနေတဲ့ ပန်းသီးကုမ္ပဏီဟာ သက်တမ်း ( ၈ ) နှစ်ထဲရောက်လာခဲ့ပါပြီ။ ရောင်းအားကျလာတဲ့ iPad ဈေးကွက်ကြောင့် အရမ်းစားတဲ့ပစ္စည်းသစ် Apple မှာ ရှိမနေတော့ပါဘူး။ လက်ပတ်နာရီရောင်းအားကလည်း တာထွက်မလှပခဲ့ပြန်ဘူး။ နောက်ထပ် သူ့ရဲ့သီချင်းရောင်းမယ့် Apple Music ဆိုတာကလည်း ပန်းသီးမြေပုံ - Apple Maps လိုပဲ အချာဆုံးရောင်းကုန်ဖြစ်နေလို့ပါ။

.

.

ဒါဆို Google ရော?

.

ဘယ်နေရာကနေတိုင်းတိုင်း Google က Facebook ထက် ကုမ္ပဏီကြီးပါတယ်။ သုံးစွဲသူ၊ အရင်းအနှီး နဲ့ အမြတ် ဘာချင်းယှဉ်မလဲ .. သူလည်း မိုက်နေတာပါပဲ။ ဒါပေမယ့် Google လက်လှမ်းမမှီတဲ့နေရာတွေမှာ Facebook က ဈေးကွက်ရလာနေတယ်။ ဥပမာ - မိုဘိုင်း နဲ့ ဗွီဒီယို ခွင် တွေမှာပေါ့။

.

ဒါပေမယ့် လကိုတက်နင်းမယ့် Google CEO - လယ်လီပိတ်ခ်ျ ရဲ့ အစီအစဉ်အောင်မြင်သွားတဲ့အခါမျိုးကျရင်တော့ ပြီးခဲ့တဲ့ ( ၁ဝ ) နှစ်ကလို နည်းပညာကမ္ဘာကို ပြန်အုပ်စိုးသွားနိုင်ပါလိမ့်မယ်။

.

.

 Microsoft ကျတော့ရော ?

.

Microsoft  က ဒီလိုင်းထဲပြန်ဝင်လာတာ ပွဲကြည့်လို့တော့ ပိုပျော်စရာကောင်းတာအမှန်ပါပဲ။ ဒါပေမယ့် သူက နောက်တန်းကနေ ခံစစ်နဲ့ကစားလာတာ နှစ်ပေါင်းမှမနည်းတော့တာ။

.

.

အမ်မဇွန် - Amazon ကို ထည့်မတွက်ဘူးလား ?

.

တွက်ပါတယ်။ အမ်မဇွန်က အနီးစပ်ဆုံးပါ။ အသုံးပြုသူများတာချင်းတူတာ၊ ထိမိသက်ရောက်လွယ်တဲ့ အဓိက အားကိုးအားထားရာစီးပွားရေးချင်းဆင်တာတွေကြောင့် လိုင်းတူတယ်လို့ပြောရမှာဖြစ်တယ်။ ဒါပေမယ့် အမ်မဇွန် က ဒီလောက်များများဖောက်သည်တွေရဖို့ နှစ်များစွာပိုကြိုးစားခဲ့ရတယ်။ ဒါတောင် Facebook သုံးသူတွေလောက်ကို များများမစည်းရုံးနိုင်ခဲ့ဘူး။ နောက်တစ်ခုက Facebook လို ပုံမှန်ထက်မလျော့တဲ့ဝင်ငွေတွေရှာနိုင်ပါတယ်ဆိုတာမျိုး အမ်မဇွန်က သက်သေမပြနိုင်ဘူးလေ။

.

.

ဒါကြောင့် မျိုးဆက်တိုင်းမှာ “ သူ့ခေါင်းဆောင် နဲ့ သူ့လူစွမ်းကောင်း - Every generation in tech has its hero ” ဆိုတာရှိကြတယ်။ အခုလက်ရှိခေတ်ရဲ့ရေစီးဆိုရင် ( ၂ဝဝ၉ ) ခုနှစ်ကစတယ်လို့ ပြောပါရစေ။ ဒီကနေ တစ်ချက်ချင်းခုန်တက်လာရင်း Facebook က ဒီဘဝရောက်လာခဲ့ရတာပေါ့။

.

အခုမျိုးဆက်ကို Facebook က အနိုင်ယူလိုက်တယ်လို့ ပြောလို့ရပါတယ်။ CEO - မာ့ခ်ဇတ်ဂါဘတ် ၊ COO – Chief Operating Officer ရှရိုင်းဆန်းဘတ် - Sheryl Sandberg နဲ့ ကျန်လူတစ်စုဟာ အခုအချိန်မှာ အသက်ဝဝရှူရင်း သူတို့စိုက်ခဲ့တဲ့ အောင်မြင်မှုအသီးအပွင့်တွေကို စားသုံးနိုင်နေပါပြီ။

.

ဒါပေမယ့် သိပ်မကြာခင်မှာ “ နည်းပညာဘုရင် ”  ဆိုတဲ့ ဘွဲ့ထူးဟာ သက်တမ်းတိုတဲ့ထီးနန်းပိုင်ရှင်အတွက်ဆိုတာ သိလာပါလိမ့်မယ်။

.

ခင်မင်ခြင်းများစွာဖြင့်

.
08-07-2015

.

ရည်ညွှန်းကိုးကား - Business Insider
.

" ဘုရင်ဖြစ်လာတဲ့Facebook " စာမူသည် ၂ဝ၁၅ ခုနှစ်၊  သြဂုတ်လ ( ၂၂ ) ရက်နေ့၊ စနေနေ့ထုတ် NetGuide နည်းပညာဂျာနယ် အတွဲ ( ၃ ) ၊ အမှတ် ( ၉၈ ) ၊ စာမျက်နှာ ( ၅၁ ) တွင် ဖော်ပြပါရှိသည်။

Download Link:http://www.mediafire.com/download/6crffzugwe71nas/NetGuide+Vol.3%2C+No.98.pdf